रुपन्देही - पूर्वी तराईमा नगदेबालीका रुपमा चिनिएको जुट खेती हाल लोप हुँदै गएको छ । दुई दशक पहिला मोरङमा झण्डै ४० हजार हेक्टरमा जुटखेती हुने गरेकोमा हाल ५ हजार हेक्टरमा सीमित भएको छ । पहिले मोरङका प्राय सबै स्थानीय तहमा जुटको खेती हुन्थ्यो भने अहिले सीमावर्ती क्षेत्रमा धनपालथान, जहदा, सुनवर्षी, रतुवामाई र रंगेली क्षेत्रका किसानले जुट खेतीको बिँडो मात्रै थामेका छन् । 

उत्पादिन जुटले पनि उचित मूल्य पाउन सकेको छैन । गतवर्ष यो समयमा जुटको मूल्य प्रतिक्विन्टल ११ हजार रुपैयाँ थियो भने यो वर्ष प्रतिक्विन्टल ९ हजार रुपैयाँ मात्र रहेको मोरङ व्यापार संघको सूची छ । जुटमा लागत अनुसार मूल्य नपाउनु, जुट तोप्ने खाडलको समस्या हुनु र खेतीका लागि आवश्यक मजदुर नपाउनु नै यो खेती विस्तारै लोप हुँदै जानुको मुख्य कारण भएको धनपालथान नोचाका किसान अकवर हुसेनको भनाइ छ ।

डेढ दशक पहिलेसम्म मोरङ, सुनसरी र झापामा झण्डै ७० हजार हेक्टरमा जुट खेती हुने गरेकोमा अहिले करिब सात हजार हेक्टरमा सीमित भएको कोशी प्रदेश कृषि निर्देशनालयको तथ्याङक छ । निर्देशनालयका अनुसार दुई दशक पहिला झण्डै ४० हजार हेक्टरमा जुट खेती हुने मोरङमा अहिले ५ हजार ७० हेक्टरमा सीमित छ । २० हजार हेक्टरमा खेती हुने गरेको सुनसरीमा अहिले १ हजार ३ सय हेक्टर र १० हजार हेक्टरमा खेती हुने झापामा अहिले ५ सय ५० हेक्टरमा खेती सीमित छ । दुई दशक पहिला यस क्षेत्रमा झण्डै ८० हजार टन कच्चा जुट उत्पादन हुने गरेकोमा हाल वार्षिक सरदर करिव १० हजार टन कच्चा जुट उत्पादन हुने गरेको निर्देशनालयको तथ्याङ छ।