नुवाकोट- हरेक वर्ष नुवाकोटको तारकेश्वर गाउँपालिका वडा नं ३ तारुकामा माघ १ गते हुदैँ आएको गोरु जुधाइ मेलामा प्रमुख अतिथि सहितको टिम हेलिकप्टरमा आएको विषय विवादित भएको छ । आयोजित उक्त मेलामा प्रमुख अतिथिका रुपमा नेपाली कांग्रेसका प्रवक्ता एवम् सांसद प्रकाशशरण महत थिए ।

प्रमुख अतिथि महत, बागती प्रदेश सांसद बहादुर सिंह लामा, गाउँपालिकाका अध्यक्ष शिव अधिकारी सहितको टिम काठमाण्डौंबाट कार्यक्रम स्थल सम्म हेलिकप्टरमा गएका थिए । काठमाण्डौंबाट २ घण्टाको बाटो त्यसमा पनि हेलिकप्टरको प्रयोग र त्यसको खर्च गाउँपालिकाको बजेटबाट १० लाख खर्च भयो भन्ने विषयले तत्काल सामाजिक संञ्जालमा ठूलो स्थान पायो । उक्त विषयको चर्को आलोचना पश्चात गाउँपालिका अध्यक्ष अधिकारी र प्रमुख प्रशासकीय अधिकृत राजु अधिकारीले उक्त विषय निराधार रहेको भन्दै सम्बन्धित सबैलाई ध्यानाकर्षण समेत गराएका छन् ।

गाउँपालिकाका प्रमुख प्रशासकीय अधिकृत अधिकारीले हेलिकप्टरका लागि कुनै पनि रकम गाउँपालिकाबाट भुक्तानि नहुने र त्यस्ता निराधार हल्लाको पछि नलाग्न अनुरोध गर्दै ध्यानाकर्षण जारी गरेका छन् ।

ध्यानाकर्षण ।
प्रस्तुत विषयमा हिजो मिति २०७९/१०/१ गते तारकेश्वर गापा ३ तारूकामा आयोजित गोरूजुधाई मेलामा प्रमुख अतिथि ज्यु लगायत सवार हेलिकप्टरको भाडा सवालमा यश गाउँ पालिकालाई समेत जोडिएको विषयमा यश कार्यालयको ध्यानाकर्षण भएको छ, । उक्त हेलिकप्टरका लागि यश कार्यालयबाट कुनै रकम भुक्तान नभएको र नहुने जानकारी गराइन्छ । साथै सम्बन्धित मेला आयोजक समितिले मेला व्यवस्थापनका लागि गाउँ पालिकाबाट सम्झौता बमोजिम उपलब्ध गराइने रकमबाट हेलिकप्टर प्रयोजनका लागि खर्च गरेमा सो बराबरको रकम भुक्तान नदिइने र सो को जिम्मेवार सम्बन्धित समिति नै हुनुपर्ने पनि जानकारी गराइन्छ । साथै गाउँ पालिकाले रकम भुक्तान गरेकोरगर्ने भन्ने निराधार हल्लाको पछि नलाग्न पनि सबैमा गाउँपालिका अनुरोध गर्दछ ।

प्रमुख प्रशासकीय अधिकृत, तारकेश्वर गापा नुवाकोट ।

मेरो व्यक्तिगत खर्चमा हेलिकप्टर लगेको हुँ : अध्यक्ष अधिकारी
गोरु जुधाइ मेलामा विगतका वर्षहरुमा पनि आफ्नो व्यक्तिगत खर्चमा प्रमुख अतिथि र अतिथिहरुलाई हेलिकप्टरमा लग्ने गरेको र यस वर्ष पनि आफ्नै खर्चमा हेलिकप्टर लगेको अध्यक्ष शिव अधिकारीले बताएका छन् । मेला व्यवस्थापनका लागि गाउँपालिकाले ८ लाख बजेट छुट्टाएको र आगामी वर्षबाट १० लाख छुट्याउने उद्घोष कार्यक्रममा गरेको थिए तर १० लाख अहिले नै हेलिकप्टरको लागि खर्च गरेको भन्ने गलत प्रचार आपत्तिजनक रहेको उनले बताए ।

उक्त विषयलाई लिएर अध्यक्ष अधिकारीको ध्यानाकर्षण यस्तो रहेको छ :

झुटको खेती बन्द गरौं ।

तारकेश्वर गाउँपालिका वडा नम्बर ३ मा माघेसक्रान्तिको अवसरमा आयोजित गोरु जुघाई मेलाका प्रमुख अतिथि, विशेष अतिथि र अतिथिहरुले प्रयोग गर्नुभएको हेलिकोप्टरमा गाउँपालिकाले १० लाख रुपैयाँ सक्कयो भनि गरिएको भ्रामक प्रचारप्रति पालिकाको गम्भिर ध्यानाकर्षण भएको छ। बिना तथ्य, प्रमाण राजनीतिक रोश र कुण्ठा व्यक्त गर्नका लागि गरिएको त्यस्ता बनावटी समाचार र सामाजिक संजालमा लेखिएका स्टाट्प्रति गम्भिर आपत्ति जनाउँदै त्यस्ता झुटा प्रचार र पित पत्रकारिताको विश्वासमा नलाग्न पनि आमनागरिकलाई आग्रह गर्दछौं ।

गोरु जुघाई महोत्वसको लागि पालिकाले ८ लाख रुपैयाँ बजेट बिनियोजन गरेको छ । त्यो मेला आयोजक समितिलाई गोरु पालक किसानहरुको प्रोत्साहन र मेला व्यवस्थापनका लागि मात्रै खर्च गरिने छ । उक्त ८ लाख रुपैयाँ भुक्तानी समेत भइसकेको छैन् । र, जुन १० लाखको कुरा छ त्यो त हिजो आयोजित कार्यक्रममा मैले आगामी आर्थिक वर्षदेखि गोरुजुघाई मेलाको संरक्षण र प्रवद्र्धनका लागि छुट्याउने घोषणा मात्र गरेको हो । त्यो रकम यो वर्षको होइन ।

साथै विगत एक दशकदेखि मैले यस मेलाको विकास, किसानहरुको प्रोत्साहन र प्रवद्र्धनका लागि व्यक्तिगत रुपमा समेत सहयेग गर्दै आएको आम तारकेश्वरबासीलाई स्मरण नै छ। मेरै पहलमा नेपाल पर्यटन बोर्डसँग सहकार्य गरेर २ लाख रुपैयाँ बजेट समेत बिनियोजन गरिएको थियो । र विगतदेखि नै प्रमुख अतिथि, विशिष्ट अतिथि र अतिथिहरुलाई मेरै पहलमा हेलिकोप्टरमा लैजाने गरिएको छ। यो वर्ष पनि मेरै पहलमा मेरो व्यक्तिगत खर्चमा त्यो व्यवस्था गरिएको हो । होलिकोप्टरको भुक्तानी भइसकेकाले उक्त रकम पालिकाबाट नगएको व्यहोरा सबैमा जानकारी गराउदै झुटा समाचारको पछि नदौडिन सबैमा आग्रह गर्दछु ।

शिव अधिकारी
अध्यक्ष
तार्केश्वर गाउँपालिका, नुवाकोट