काठमाडौं- सङ्घीय मामिला तथा सामान्य प्रशासन मन्त्रालयका अनुसार देशभरका ७५३ पालिकामध्ये २२९ पालिकामा प्रमुख प्रशासकीय अधिकृत रिक्त छन् । यीमध्ये कतिपय निमित्तको भरमा चलेका छन् भने कतिपयमा खाली छ ।

मन्त्रालयले दिएको विवरण अनुसार १२२ नगरपालिका यतिबेला प्रमुख प्रशासकीय अधिकृतविहीन छन् । यस्तै, ९७ गाउँपालिका र ९ वटा उपमहानगरपालिकामा प्रमुख प्रशासकीय अधिकृत रिक्त छन् ।

उपमहानगरपालिकामा सहसचिव तहको कर्मचारी पठाउनुपर्ने भए पनि ९ वटा उपसचिव तहका कर्मचारीले निमित्तको भूमिकाका काम गरिरहेका हुन् ।

प्रदेश अनुसार प्रमुख प्रशासकीय अधिकृतको विद्यमान अवस्था
कोशी प्रदेशमा प्रमुख प्रशासकीय अधिकृतको १३७ दरबन्दी रहेकोमा १०२ मात्र पदपूर्ति छ भने ३५ रिक्त छ । मधेस प्रदेशमा १३६ दरबन्दी रहेकोमा ६२ पदपूर्ति भएको छ भने ७४ पालिका प्रमुख प्रशासकीय अधिकृतविहीन छन् ।

यस्तै, बागमती प्रदेशमा ११९ जनाको दरबन्दी रहेकोमा १०७ जना पदपूर्ति छ भने १२ पालिका प्रमुख प्रशासकीय अधिकृतविहीन छन् । गण्डकी प्रदेशमा ८५ दरबन्दी रहेकोमा ८० जनाको पदपूर्ति भएको छ भने ५ पालिका रिक्त छन् ।

लुम्बिनी प्रदेशमा १०९ दरबन्दी रहेकोमा ९९ पदपूर्ति भएको छ भने १० पालिका रिक्त छन् । कर्णाली प्रदेशमा ७९ दरबन्दी रहेकोमा ४० पदपूर्ति भएको भने ३९ पालिका रिक्त छन् ।

यता सुदूरपश्चिम प्रदेशमा ८८ दरबन्दी रहेकोमा ३४ पदपूर्ति भएको छ भने ५४ पालिकामा प्रमुख प्रशासकीय पद रिक्त छ ।